സ്വന്തം ക്ലാസ്സ്മുറിയിലേക്ക് ഫാന്‍ സ്പോണ്‍സര്‍ചെയ്ത് അശ്വിന്‍ മാത്യ് കയായി.......
കയ്യൂര്‍: ജനകീയക്കൂട്ടായ്മയിലൂടെ മുഴുവന്‍ ക്ലാസ്മുറികളും സ്മാര്‍ട്ട് ആക്കാനുള്ള ശ്രമം തക്യ് തിയായി നടക്കുന്നതിനിടെയാണ് കയ്യൂര്‍ ഗവ:എല്‍.പി.സ്കൂളിലെ നാലാംക്ലാസ്സിലെ ലീഡറായ അശിന്റെ ചോദ്യം,“സാര്‍,നമ്മുടെ ക്ലാസ്സി ലേക്കുള്ള ഫാന്‍ ഞാന്‍ സ്പോണ്‍സര്‍ ചെയ്യട്ടെ?”പലരോടും ആവശ്യപ്പെട്ടിട്ടും സ്പോണ്‍സറിംഗ് നടക്കാതായപ്പോള്‍ പി.ടി.എ നേരിട്ടുതന്നെ ഫാന്‍ വാങ്ങണമെന്ന് തീരുമാനിച്ചിരിക്കെ നിനച്ചിരിക്കാതെ വന്ന ഓഫര്‍ പ്രധാനാധ്യാപകന്‍ സഹര്‍ഷം സ്വാഗതം ചെയ്തു.അശ്വിന്റെ രക്ഷിതാക്കളെ വിളിച്ച് കാര്യം അന്വേഷിച്ചപ്പോള്‍ സംഗതി ബോധ്യപ്പെടുകയും ചെയ്തു.ബന്ധുവീട്ടുകാര്‍ക്ക് പാരിതോഷികമായി ലഭിച്ചഫാനുകളില്‍ ഒന്ന് അശ്വിന്റെ വീട്ടിലേക്ക് നല്‍കിയപ്പോള്‍,‘’ഇവിടെ ഇപ്പോള്‍ത്തന്നെ ആവശ്യത്തിനു ഫാനുണ്ടല്ലോ.. ..പിന്നെന്തിനാണൊന്നുകൂടി..ഇത് നമുക്ക് സ്കൂളിലേക്ക് കൊടുത്താലോ?”എന്ന നിര്‍ദേശം അശ്വിന്‍ തന്നെയാണത്രേ മുന്നോട്ടുവെച്ചത്..രക്ഷിതാക്കളായ പലോത്തെ അശോകനും ദീപയും അത് സമ്മതിച്ചതിനെത്തുടര്‍ന്നാണ് അശ്വിന്‍ തന്റെ തീരുമാനം സ്കൂളില്‍ അറിയിച്ചത്.സ്കൂള്‍ അസംബ്ലിയില്‍ വെച്ച് സ്കൂള്‍ ലീഡര്‍ ആദിത്യ രവീന്ദ്രന്‍ അശ്വിനില്‍ നിന്നും ഫാന്‍ ഏറ്റുവാങ്ങി.ആളുകള്‍ കൂടുതല്‍ക്കൂടുതല്‍ സ്വാര്‍ഥരായിമാറിക്കൊണ്ടിരിക്കുന്ന ഈ കാലത്ത്, അശ്വിന്‍ കാണിച്ച സന്മനസ്സ് മുതിര്‍ന്നവര്‍പോലും മാത്യ് കയാക്കേണ്ടതാണെന്ന് അശ്വിനെ അഭിനന്ദിച്ചുകോണ്ട് സംസാരിക്കവെ പ്രധാനാധ്യാപകന്‍ കെ.നാരായണന്‍ ഊന്നിപ്പറഞ്ഞു.ഈ അധ്യയനവര്‍ഷം അവസാനിക്കും മുമ്പുതന്നെ എല്ലാ ക്ലാസ്സുകളിലും എല്‍.സി.ഡി.പ്രൊജക്റ്റര്‍,ലാപ്ടോപ്,ഇന്ററാക്റ്റീവ് വൈറ്റ് ബോര്‍ഡ്,സൌണ്ട്സിസ്റ്റം എന്നിവ സ്ഥാപിച്ച് ‘സ്മാര്‍ട്ട് ക്ലാസ്സ് റൂം‘സങ്കല്‍പ്പം അക്ഷരാര്‍ഥത്തില്‍ യാഥാര്‍ഥ്യമാക്കാനുള്ള ശ്രമത്തിലാണ് കയ്യൂര്‍ ഗവ.എല്‍.പി.സ്കൂള്‍. ആദ്യ സ്മാര്‍ട്ട് ക്ലാസ്സ് റൂമായി നാലാം ക്ലാസ്സിനെത്തന്നെ ജനുവരി26നു പ്രഖ്യാപിക്കാനാണ് പരിപാടി.ഇതിനാവശ്യമായ ഒരു ലക്ഷം രൂപ രക്ഷിതാക്കളില്‍നിന്നും നാട്ടുകാരില്‍ നിന്നുമായി ഇതിനകം സമാഹരിച്ചിട്ടുണ്ട്.ഗ്രാമപഞ്ചായത്തിന്റെയും എം.പി, എം.എല്‍.എ തുടങ്ങിയ ജനപ്രതിനിധികളുടെയും ഫണ്ടുകള്‍ ലഭ്യമാക്കിക്കൊണ്ട് മറ്റു ക്ലാസ്സുകളും സ്മാര്‍ട്ട് ആക്കുകയാണ് ലക്ഷ്യം.
